Əllərini göndər gəlsin yanıma...

Əllərini göndər gəlsin yanıma...
Əlizadə Nuri

Ürəyimi görməmişəm, nə bilim,-
Bəlkə elə damar yeri ağrıyır?
Bu dünyanın əyri daşı ağrımaz,
Bu dünyanın hamar yeri ağrıyır.

O qoca da atıb getdi qarısın,
O qarı da yarı adam, yarı su...
Köhnə yaram təzələri sarısın,
Canımdakı qubar yeri ağrıyır.

Mənim əlim bəlkə sənin əl izin?
Qoyma dünya gözlərində ərisin..
Bir dəfə sən adımı çək, əzizim,--
Adımdakı qabar yeri ağrıyır...

Üfüqləri kim çəkibdi tarıma?
Aman bulud, için- için zarıma.
...Əllərini göndər gəlsin yanıma,--
Saçlarımda tumar yeri ağrıyır...

Miq.Az




İSTİFADƏ QAYDALARI

Müəllif hüquqları qorunur.
Məlumatdan istifadə etdikdə istinad mütləqdir.
Məlumat internet səhifələrində istifadə edildikdə müvafiq keçidin qoyulması mütləqdir.

BİZİMLƏ ƏLAQƏ

Tel: +994 55 875 56 58
[email protected]

www.miq.az