“Kim bu hadisəni ört-basdır edib, balasının başına gəlsin…”

“Kim bu hadisəni ört-basdır edib, balasının başına gəlsin…”

Bakının Xətai rayonundakı 263 saylı orta məktəbdə 1-ci sinifdə oxuyan oğlan uşağının həmin məktəbin 10-cu sinif şagirdi (bəzi məlumata görə iki şagirdi) tərəfindən zorlanması, yaxud seksual zorakılığa məruz qalması iddiaları ilə bağlı qalmaqaldan  sonra bu gün məktəbdə valideyn iclası keçirilib. İclasda direktor Nurqələm Bayramova və uşağın himayəçisi qismində çıxış edən xalası məlumatı yayanları məhkəmə ilə hədələyib.

Bu barədə virtualaz.org saytına iclasdan çıxan  valideynlər məlumat veriblər."Dedilər ki, uşağın valideynləri qəzada ölüb, onu xalasının himayəsinə veriblər. Xalası da bildirdi ki, uşaq məktəbin tualetində yıxılıb, zorlamada  ittiham olunan uşaqlar isə əksinə, ona köməklik ediblər, yerdən qaldırıblar”, -valideynlərdən biri söyləyib.

Direktor isə valideyinləri sakitləşdirərək  bu məlumatın "qəsdən yayıldığını”, məktəbə qarşı "təxribat” olduğunu deyib. Bildirib ki, məsələ artıq yoluna qoyulub, polisə də müvafiq izahat verilib.

Direktor Nurqələm Bayramova

Valideynlər deyiblər ki, uşağın xalasının hədəsindən sonra heç kim etiraz etməyib, hadisənin düzgün araşdırılmasında israr etməyib. "Görəndə ki, uşağın himayəçisi direktorun dediyini deyir, biz nə edə bilərdik? Ona görə də heç kim məsələnin düzgün araşdırılmasında israr etmədi”-iclasdan çıxan valideyinlərdən biri danışıb.

Direktor Nurqələm Bayramova isə gün ərzində əməkdaşlarımızın telefon zənglərinə israrla cavab verməyib. Ötən gün də əməkdaşlarımız onun mobil telefonuna çoxsaylı zənglər edib, direktor zənglərə cavab verməyib. Məktəbdəki mənbələr deyirlər ki, Xətai rayon Polis İdarəsinin təhqiqatçısı dünən direktorun iştirakı ilə zorakılığa məruz qalan azyaşlının xalasından ifadə alıb.

"Qadın ifadəni təhqiqatçının diqtəsi ilə yazırdı. Təhqiqatçı ona diqtə edib yazdırdı ki, uşağa qarşı seksual zorakılığın olduğu təsdiqini tapmayıb”-mənbəmiz deyir.

DİN-in mətbuat xidməti isə ötən gün saytımıza açıqlamasında "faktın deyilən formada təsdiqini tapmadığını” demişdi.

Maraqlıdır ki, direktorun iclasda valideyinlərə dedikləri ilə onun ötən gün məktəbin qarşısına toplaşan valideyinlərin qarşısında dedikləri ilə üst-üstə düşmür. Çünki direktor dünən "10-cu sinif şagirdinin 1-ci sinif şagirdini vurduğu”, insidentin ancaq bundan ibarət olduğunu demişdi. İndi isə o, iclasda tamam fərqli versiya ilə çıxış edib.

Xatırladaq ki, valideyinlərin dediklərinə görə direktor məktəbdə baş vermiş seksual zorakılıq cinayətini ört-basdır etmək üçün həmin 10-cu sinif şagirdinin valideyinləri ilə anlaşıb, zorakılığa məruz qalan uşağın xalasına 2 min manat verib. Direktor özü bu deyilənləri rədd edir.

"Uşaq mənim övladımla birgə oxuyur. Oğlum dedi ki, bu gün  dərsə gəlib, amma sinifdə heç bir uşaqla danışmayıb. Xalası iclasda dedi ki, onun uşağını biabır etmək istəyənləri cəzalandıracaq, bu onun və məktəbin işidir, digərlərinin qarışması düzgün deyil. Polis də belə hadisənin baş vermədiyini söyləyəndən sonra valideynlərin deməyə sözü qalmadı”-bunu da direktorun iclasında iştirak etmiş başqa valideyin deyir.

Valideynlər onu da əlavə ediblər ki, hadisədən sonra məktəbdə  nəzarət gücləndirilib, kənar şəxslər, hətta valideynlər içəri buraxılmır. İbtidai sinif müəllimlərinə uşaqlara nəzarət etmələri tapşırılıb, dərs vaxtı uşaqlar ayaqyoluna buraxılmır. Hadisədən sonra nəzarətçilər təyin edilib, ayaqyolu və dəhlizdə gəzirlər.

Sual yaranır, əgər məktəbdə belə hadisə baş verməyibsə o zaman direktor niyə ayaqyoluna və dəhlizlərə nəzarətçilər təyin edib, uşaqları dərs vaxtı ayaqyoluna buraxmamağı tapşırıb?

Yuxarı sinif şagirdləri isə  deyirlər ki, zorlama həqiqətən baş verib, sadəcə məsələni gizlətməyə çalışırlar.

"Hadisə dərs vaxtı olub, tualetdə uşaqdan başqa heç kim yoxmuş. Zorlayanlar   qalıb bir kənarda, başqa bir uşağın boynuna qoymağa çalışıblar. Həmin oğlanı uşağa göstəriblər, o da tanımadığını deyib. Direktor həmin uşaqların  kim olduğunu yaxşı bilir. Onuncular məktəbə yalnız həftənin 2 günü gəlirlər, digər günlər repititor yanına gedirlər. Eşitdiyimizə görə oğlanların biri məktəbin yaxınlığında yaşayır. Hadisədən sonra qorxusundan məktəbə gəlmirlər”-yuxarı sinif şagirdlərindən biri deyib.

Məktəbdə olan daha bir mənbə isə deyib ki, uşaq ona qarşı iyrənc hərəkət edən 10-cu sinif şagirdinin əlamətlərini sadalayıb-eynək taxır, üzü sızanaqlıdır.

Təhsil eksperti Kamran Əsədli məktəb ətrafında bu qalmaqalı virtualaz.org-a şərh edərkən deyib ki, onun da məktəbdəki mənbələri zorlama hadisəsinin olduğunu təsdiqləyir.

"Məktəbdə belə cinayət verirsə, buna görə məktəb direktoru, tərbiyə işləri üzrə müavin və sinif rəhbəri məsuliyyət daşıyır. Hadisə araşdırılanadək hər üçü vəzifəsindən kənarlaşdırılmalıdır. Mən şokdayam, başqa heç nə deyə bilmirəm. Hadisə olubsa və bu işi ört-basdır edirlərsə qoy onların da övladlarının başına belə hadisə gəlsin”-K.Əsədli deyir.

Lakin göründüyü kimi bu cür dəhşətli cinayət əməlinin baş verdiyi iddia edilən məktəbin direktoru, müavini və sinif rəhbəri vəzifələrindən hələ də kənarlaşdırılmayıb. Bakı şəhər Təhsil İdarəsinin rəisi Məhəbbət Vəliyeva da hələ ortaya çıxıb məktəbdə nə baş verdiyi haqda danışmayıb, məsələyə münasibət bildirməyib və məktəb rəhbərliyi barəsində tədbir görməyib. Hansı ki, təhsil sferası üzrə mütəxəssislər deyirlər ki, Bakı məktəbləri məhz M.Vəliyevanın bu vəzifəyə təyin olunmasından sonra əsl bazara çevrilib. Repititor yanına gedən yuxarı snif şagirdlərinin pul qarşılığında dərslərdən azad edilməsi, uşaqlardan pul yığılması, müəllimlərin dərs keçməkdən başqa nə işlə desən məşğul olması onun vaxtında geniş yayılıb.

"Təhsil işçiləri adətən aşağı əmək haqqından gileylənir. Amma Bakıda elə qadın məktəb direktorları var ki, axırıncı model BMW "Audi” ciplərdə gəzir. Qoy araşdırsınlar görək dəyəri 200 min manata çatan bu avtomobillər həmin direktorlarda haradandır?”-bunu Bakı məktəblərindən birinin müəllimi deyir...



İSTİFADƏ QAYDALARI

Müəllif hüquqları qorunur.
Məlumatdan istifadə etdikdə istinad mütləqdir.
Məlumat internet səhifələrində istifadə edildikdə müvafiq keçidin qoyulması mütləqdir.

BİZİMLƏ ƏLAQƏ

Tel: +994 55 875 56 58
[email protected]

www.miq.az