ABŞ-da ilk dəfə “Leyli və Məcnun” operası - Video

“Leyli və Məcnun” operası ABŞ-da ilk dəfə ifa edilmişdir

Noyabrın 10-da dahi bəstəkarımız Üzeyir Hacıbəylinin ˝Leyli və Məcnun˝ muğam operası Kaliforniyanın San Fransisko şəhərində ifa edilmişdir. Opera San Fransisko Dünya Musiqisi Festivalı (San Francisco World Music Festival) çərçivəsində səhnələşdirilmişdir. Bu, ˝Leyli və Məcnun˝ operasının ABŞ-da ilk nümayişidir.

Azərbaycanın Los Ancelesdəki Baş Konsulu Nəsimi Ağayev tədbiri giriş sözü ilə açaraq, ˝Leyli və Məcnun˝ operası barədə məlumat vermiş, onun müsəlman dünyasında ilk opera olduğunu və indiyə kimi sevilə-sevilə ifa edildiyini qeyd etmişdir. Sonra diplomat Azərbaycanın xalq artisti, məşhur pianoçu, hazırda San Fransiskoda yaşayan Çingiz Sadıqova San Fransisko Dünya Musiqisi Festivalının xüsusi fəxrnaməsini təqdim etmişdir. Fəxrnamə Ç.Sadıqova Azərbaycan musiqi və mədəniyyətinin ABŞ-da və bütün dünyada təbliği sahəsində gördüyü işlərə görə verilmişdir.

Sonra opera tamaşası başlamışdır. Gənc xanəndələr Vüsalə Musayeva və İlkin Əhmədov Leyli və Məcnun rollarını ifa etmişlər. Mahir instrumental ifaçılar İmamyar Həsənov (kamança) və Rüfət Həsənov (tar), eləcə də Çin, Hindistan, Cənubi Koreya və ABŞ musiqiçilərindən ibarət orkestr xanəndələrimizi müşayiət etmişdir.

Opera tamaşaçıların gurultulu və ayaqüstü alqışları ilə qarşılanmışdır. Tamaşada 500-dək tamaşaçı iştirak etmişdir.

Tamaşadan video-görüntülərlə bu linklərdə tanış olmaq olar: