Ağdamda qədim yaşayış yeri tapılıb

Vətəninfo.az  xəbər verir ki, Azərbaycan Milli Elmlər Akademiyası (AMEA) Arxeologiya və Etnoqrafiya İnstitutunun “Qarabağ neolit-eneolit ekspedisiyası”nın Qarabağ düzənliyində - Ağdamın Xındırıstan kəndi ərazisində yerləşən İsmayılbəytəpə neolit dövrü yaşayış yerində apardığı qazıntılar zamanı xeyli sayda arxeoloji mədəniyyət nümunələri - yaşı səkkiz min ilə yaxın olan tikili divarları, sapand daşları və təsərrüfat küpləri aşkarlanıb. APA-nın Qarabağ bürosunun xəbərinə görə, abidədə aparılmış arxeoloji qazıntılar zamanı 400 kv.m sahədə e.ə. VI minilliyin I yarısına aid olan memarlıq nümunələri üzə çıxıb. “Qarabağ neolit-eneolit ekspedisiyası”nın rəhbəri arxeoloq, tarix üzrə fəlsəfə doktoru Xaqani Alməmmədov bildirib ki, aşkar edilən artefaktlar nəinki Azərbaycan, bütün Qafqaz neoliti üçün bir yenilik hesab olunur. Düzbucaqlı plan quruluşuna malik olan tikili qalığı iki otaqdan ibarətdir, samansız çiy kərpiclə inşa edilib.

Qazıntı zamanı tapılan maraqlı tapıntılar arasında həcmi ənənəvi ölçülərdən daha böyük olan iki təsərrüfat küpü və 52 ədəd böyük sapand daşıdır. Arxeoloji tapıntıların bərpası üzrə mütəxəssis, tarix üzrə fəlsəfə doktoru Nasir Quluzadənin sözlərinə görə, aşkarlanan arxeoloji mədəniyyət nümunələrinin qalıqları bərpa olunmaq üçün yerli mütəxəssislərin ixtiyarına veriləcək. Qazıntı işləri ilə yanaşı mütəxəssislər Ağdam, Ağcabədi və Bərdə rayonları ərazisində 30-dan çox arxeoloji abidəni elektron qeydiyyata alaraq xəritələşdiriblər.

Vətəninfo.az