2016-cı il aprelin 2-i MN-i rəsmi məlumatına bir daha diqqət yetirək.

Aprelin 2-nə keçən gecə və gün ərzində bütün cəbhə boyu möqelərimiz və yaşayış məntəqələrimiz düşmən tərəfindən intensiv atəşə məruz qalıb. Bunun nəticəsində mülki əhali arasında ölən və yaralananlar var.

Bu təxribatın qarşısının alınması, mülki əhalinin təhlükəsizliyinin təmin olunması məqsədilə Silahlı Qüvvələrimizin komandanlığı tərəfindən Ağdərə-Tərtər-Ağdam və Xocavənd-Füzuli istiqamətində cavab tədbirlərinin keçirilməsi barədə qərar qəbul edilib.

...Hazırda həmin yüksəkliklər və yeni müdafiə xətti boyu müvafiq gücləndirmə tədbirləri həyata keçirilir, yeni səngərlər qazılır və mövqelərdə möhkəmləndirmə işləri aparılır.

...Müdafiə Nazirliyi bildirir ki, atəşkəs rejimi haqqında razılaşmanın Ermənistan tərəfindən pozulması təkrarən baş verərsə düşmənə vurulacaq zərbələr daha ağır və sarsıdıcı olacaqdır."

MN-nin məlumatında əməliyatın elan olunmuş məqsədi- düşmən təxribatlarının qarşısını almaq və müəyyən yaşayış məntəqələrimizi onun atəşi altından çıxarmaq olmuşdu.

Artıq aprelin 3-ü isə müdafiə naziri Z.Həsənov tərəfimizdən atəşkəsin bərpa olunmasını bəyan etmişdi. Lakin növbəti günlərdə ermənilər itirdikləri mövqeləri qaytarmaq məqsədilə arası kəsilmədən hücumlar etdilər. Bu zaman biz yeni tutduğumuz mövqeləri və cəbhə boyunca mövqelərimizi gücləndirir, düşmənə cəmləşmə rayonlarında sarsıdıcı artilleriya zərbələri endirir, hücumlarını dəf edir, ordumuzun silahlanmasında olan yeni silahları döyüş şəraitində tətbiq edirdik.

Düşmən öz əkshücumlarında çoxsaylı texnika və canlı qüvvə itkilərinə uğradılıb, itirdiyi mövqeləri qaytara bilməyəcəyinə əmin olandan və Azərbaycanın cəbhə xəttinə iri hücum qüvvələrini çəkdiyini görəndən sonra aprelin 5-i Rusiyanın atəşkəs çağırışlarına razılaşmışdı. Formal baxsaq, Rusiya bizi yox, ermənini dayandırıb, biz aprelin 2-i işimizi görüb, zatən dayanıb, müdafiəyə keçmişdik. 

Böyük müharibə planında belə, ATƏT, BMT və ermənilərin havadarlarının hərbi əməliyatları siyasi-diplomatik yollarla dərhal dayandırmağa çalışacaqları real faktor kimi nəzərə alınmalıdır. Ona görə hərbi plan və əməliyat növü elə hazırlanmalıdır ki, qoşunların əsas döyüş vəzifələrini yerinə yetirməyə vaxtı olsun və hərbi əməliyatların dayandırma anında qoşunlarımız artıq əlverişli mövqelərdə olsunlar ki, dayandırma bizə sərf eləsin.