Bakıda yeni sərgi-yarmarkalar keçirildi

Detektiv yazarlar Müşfiq XAN və Elxan Elatlı ilə görüş təşkil olunub.

Bakı Şəhər Mədəniyyət və Turizm İdarəsi ilə Hədəf Nəşrlərinin birgə  gerçəkləşdirdiyi “Səyyar kitab” layihəsi çərçivəsində növbəti sərgi-yarmarkalar keçirildi.

Hədəf Nəşrlərinin mətbuat xidmətindən verilən məlumata görə, sərgi-yarmarkalar  martın 29-da Binə Mədəniyyət Sarayının qarşısında,  aprelin 1-də isə Bakı Pedaqoji Kadrların İxtisasartırma və Yenidənhazırlanma İnstitutunda da təşkil olundu. Mindən çox adda, Azərbaycan, ingilis, türk və rus dillərində kitabların təqdim olunduğu sərgidə yüzlərlə Binə sakini iştirak edib.  Hər iki tədbir saat 11-dən axşam 18-ə qədər davam edib. Sərgi-yarmarkalarda  kitabların güzəştli qiymətlərlə satışı ilə yanaşı, “bir kitab alana bir kitab hədiyyə” kampaniyası da həyata keçirilib və kitablar hədiyyə olunub. 

Həmçinin Bakı Pedaqoji Kadrların İxtisasartırma və Yenidənhazırlanma İnstitutunda keçirilən sərgi-yarmarka çərçivəsində detektiv yazarlar Elxan Elatlının "Seçilmiş cəza" və Müşfiq XANın "Sonuncu hədiyyə" adlı yeni romanlarının təqdimat və imza mərasimi oldu. Tədbirə  qatılan institutun rektoru, professor Asif Zamanov  həmmüəlifi olduğu “Özünü tanı” kitabını oxuculara imzası ilə təqdim etdi və geniş bir nitqlə çıxış edərək, layihənin əhəmiyyətindən danışdı.

Yazıçılar Şəmil Sadiq və Sevindik Mehman da çıxış edərək, Azərbaycanda milli ədəbiyyatın inkişafında yeni mərhələ başlandığını və cəmiyyətdə kitaba marağın yenidən oyandığını qeyd etdilər.