Bu filtrləri almayın

Son vaxtlar Bakıda və ölkənin digər şəhərlərində "çox effektiv su filtrləri" satanlar qapı-qapı dolaşır, "unikal məhsul"u təklif edirlər.
Yalçın İslamzadə bu fırıldaqçılarla bağlı Facebook-dakı profilində yazıb: "Səyyar satıcılar ev üçün filtrlər təklif edir, müştərini yola gətirmək üçün pulsuz test keçirirlər. Test zamanı "presipitator" deyilən portativ elektroliz cihazının elektrodları suya daxil edilir, cərəyan keçdikcə su bulanıqlaşır və rəngi tündləşir. Bunu krant suyunun kirliliyinə sübut kimi göstərirlər. Elementar məntiq deyir ki, o qədər kirlilik suyun harasında idi ki, indi görünən oldu? Əslində, su sonradan kirlədilir, elektrodlardan biri dəmirdir, elektroliz nəticəsində oksidləşdikcə su bulanır.
Özləri ilə gətirdikləri suda bu hal baş vermir, çünkü krant suyunda həll olunmuş minerallar var və su elektrolit kimi elektriki keçirir.
Təmiz deyə gətirdikləri suda elektroliz baş vermir, su bulanmır - çünki tərkibində minerallar yoxdur. O suya xörək duzu əlavə edilib qarışdırılsa, onun da rəngi krant suyunun rəngi kimi dəyişəcək.
Reklam üçün, "dünən bir kimya professorunun evinə quraşdırdıq" deyirlər.
Müftə pendir, sadəcə, tələdə olur".

Milli.Az