Ebola yaxın həftələrdə pik həddinə çatacaq

Qərbi Afrikada yaxın bir neçə həftə ərzində Ebola virusu epidemiyası öz pik həddinə çata, daha sonra isə zəifləyə bilər.

Lakin regionda epidemiyanın ağır nəticələri hələ 2015-ci ilin sonuna qədər hiss olunacaq. Bu proqnozu 1976-cı ildə Ebola virusunu kəşf edən məşhur Belçika alimi Piter Piot verib.

Vətəninfo.az BBC telekanalına istinadən xəbər verir ki, Ebola virusu səbəbi ilə baş qaldırmış epidemiyanın Liberiyada artıq pik həddinə çatdığını və bu halın yaxın bir neçə həftədə Serra-Leonedə də baş verəcəyini güman etdiyini deyən Piot xəstəliyin səngiməsi üçün uzun müddət lazım gələcəyini vurğulayıb.

Dünya Səhiyyə Təşkilatının dekabrın 20-nə olan məlumatına görə Ebola virusu qurbanlarının sayı 7373 nəfərə, virusa yoluxanların sayı isə 19 031 nəfərə çatıb. Ölüm hallarının əksəriyyəti Qərbi Afrikanın üç ölkəsində - Liberiya, Serra-Leone və Qvineyada qeydə alınıb.