Əlvida

Aqil Kəngərli (Tarixçi-şair)

Bir xoş gün görəmmədim,ömrün gənc çağlarında,

Soldu vusal gülləri,həsrət bağçalarında.

Bu həsrətin kədərli,yaxın-uzaqlarında,

Unutmaram heç zaman səni bir an dünyada,

Gülüm,sağ-salamat qal.Xoşbəxt yaşa.Əlvida...

Bizim bu pak sevgimiz,nə etmişdi,kimə,nə ?

Nə səni anladılar,nə rəhm etdilər mənə.

Bağladı yolumuzu,köhnə adət-ənənə,

Bizi özgələr deyil,doğmalar saldı oda,

Gülüm,sağ-salamat qal.Xoşbəxt yaşa.Əlvida...

Boyun əydik taleyə,səddi aşa bilmədik,

Saxta "eşqlər"yaşadıq,uyğunlaşa bilmədik.

Gördük bir-birimizi,yaxınlaşa bilmədik,

Mən yelkənsiz bir qayıq,sən dənizdə bir ada,

Gülüm,sağ-salamat qal.Xoşbəxt yaşa.Əlvida

Nəsibimiz ayrılıq,kədərdisə,ahdısa,

Biz qismətə nökərik,o da bizə şahdısa,

Nəyi dəyişmək olar,bəxt yazan Allahdısa,

Yaradanın yolunda olsun canımız fəda.

Gülüm,sağ-salamat qal.Xoşbəxt yaşa.Əlvida.

Göz yaşımız gizlicə qəlbimizə axsa da,

Bizi birgə görənlər,rişxənd ilə baxsa da,

Naləmiz,fəryadımız,şimşək kimi çaxsa da,

Bu nisgillər içində,getsə də ömür bada,

Gülüm,sağ-salamat qal.Xoşbəxt yaşa.Əlvida.

Hər çiçəyin ətiri,səni xatırladacaq,

Birgə keçirdiyimiz anı xatırladacaq.

Sonu ayrılıq olan,günü xatırladacaq.

Gündüz GÜNəş,gecə AY səni salacaq yada,

Gülüm,sağ-salamat qal.Xoşbəxt yaşa.Əlvida.

Əllərində əlimin izi yaşayacaqsan,

Qəlbində özünü yox,bizi yaşayacaqsan,

Düşünüb hər dediyim sözü,yaşayacaqsan.

Yaddaşında qalacaq bu səs,bu ün,bu səda,

Gülüm,sağ-salamat qal.Xoşbəxt yaşa.Əlvida.