İlanla fala baxan qadın axtarışa verildi

Bakıda məşhur ekstrasens dələduzluq etdiyinə görə axtarışa verilib.

Ekstrasens Tamilla Salamova vətəndaşların etibarından sui-istifadə edərək külli miqdarda pul mənimsəməkdə şübhəli bilinir. Onunla bağlı artıq iki nəfər zərərçəkən qismində Səbail Rayon Polis İdarəsinə şikayət edib.
T.Salamova istintaqdan yayınaraq ifadə verməkdən boyun qaçırdığı üçün onun barəsində axtarış elan edilib.
Qeyd edək ki, T.Salamova "Lider" TV-də yayımlanan "Ekstra hiss" yarışının qalibi olub. O, müxtəlif televiziya kanallarında ayrı-ayrı verilişlərə qonaq qismində qatılıb. Ekstrasensin saytında T.Salamovanın "İnsanlardan, onların evlərindən cin, şeytan, ruhu uzaqlaşdırmaq və cadu çıxarmaq qabiliyyətinə malik olduğu" iddia edilir. O, evində ilan saxlayıb, fala da ilanlarla baxıb.

Milli.Az