Ölkənin qərb bölgəsini sel aparıb - Fəlakət

“Vətəninfo.az”a Qazax sakinlərinin verdiyi məlumata görə, şənbə günü gecə saatlarından başlayaraq yağan güclü yağış selə çevrilib. Sel nəticəsində Qazağın bir çox kəndlərinə, əsasən də, Ağköynək, Qarapapaq, Xanlıqlar, Balacəfərli,Böyükcəfərli kəndlərinə güclü ziyan dəyib. Belə ki, elektrik enerjisinin verilməsində müəyyən fasilələr yaranıb, kəndlilərin mal-qarasını sel aparıb.

Qeyd edək ki, sel nəticəsində bir neçə nəfər xəsarət alıb.

Əlavə edək ki,ölkənin qərb bölgəsinə yağan güclü yağışlar Ağstafa rayonunda da fəsadlar törədib. Sel rayonun Dağkəsəmən kəndində evlərə və həyətyani sahələrə ziyan vurub. Kənd sakinlərinin sözlərinə görə, yağışın fəsadının ağır olmasına səbəb dağlarda bəndlər vasitəsilə selin qarşısının kəsilməməsi və selin birbaşa kəndə istiqamət almasıdır. Kənd ərazisində yolboyu arxların olmasına baxmayaraq Qazax və Ağstafa rayonlarını birləşdirən yol tamamilə sel sularının altında qalıb.