Xəbərin yoxdu

İbrahim İLYASLI

(Əli Kərim adına Sumqayıt şəhər Poeziya Klubunun direktoru, tanınmış şair)

Məni aləmlərdən agah bilirsən,

Qəflətdə qafiləm, xəbərin yoxdu.

Bilən kölə bilir, sən şah bilirsən,

Sərgərdan səfiləm, xəbərin yoxdu.

Mən sənin suçlunam, budu əlacım – 

Ayağım tutduqca özümdən qaçım.

Uçurulub taxtım, alınıb tacım,

Talanıb dəfinəm, xəbərin yoxdu.

Demə vurulmuşam sənin nəyinə,-

Niyə sığınmışam dar ətəyinə.

Niyə dur dəlinə, al yedəyinə,

Adına təhviləm, xəbərin yoxdu.