ABŞ Azərbaycandan neft məhsulları idxalını xeyli artırıb

2015-ci ilin I yarısında ABŞ Azərbaycandan 575 min barel neft məhsulları alıb. Bu, ötən ilin eyni dövründəkindən 6,8 dəfə çoxdur.

Bu barədə ABŞ Dövlət Energetika İnformasiyası İdarəsinin (EIA) saytı məlumat verir.

Ötən ilin eyni dövründə ABŞ Azərbaycandan 84 min barel neft məhsulları idxal etmişdi.

2014-cü ildə ABŞ Azərbaycandan 484 min barel, 2013-cü ildə 366 min barel neft məhsulları idxal edib.

Uzun fasilədən sonra (2009-cu ildən) 2012-ci ildə ABŞ Azərbaycandan neft məhsulları idxalını bərpa edib. 2008-ci ildə ABŞ-a Azərbaycandan 308 min barel neft məhsulları idxal edilib.

Amma EIA-nın informasiyasında ABŞ-ın Azərbaycandan hansı neft məhsulları idxal etdiyi açıqlanmır.

Azərbaycan dünya bazarında avtoyanacaq tədarük etmir. Regional bazara yalnız dizel yanacağı satılır. Dünya bazarında SOCAR-ın rəqabət qabiliyyətli neft məhsulu aviakerosindir. ("Turan")