Rusiya yeni riskli addımlara hazırlaşır

ABŞ müdafiə naziri Ceyms Mettis Rusiyanı ABŞ-ın əsas strateji düşməni sayıb.

ABŞ nümayəndələr palatasında  2018-ci ilin müdafiə büdjəsinin müzakirəsinə qatılan Ceyms Mettis bildirib ki, prezident Vladimir Putin Moskva üçün "strateji rəqib" rolu müəyyən edib.

"Hazırda heç bir əlamət görmürəm ki, Putin bizimlə yaxşı münasibət qurmaq isətyir", - deyə Pentaqon başçısı vurğulayıb.

İstiPress-in "BBC”yə istinadən verdiyi xəbərə görə, ABŞ ordusunun birləşmiş qərargahlarının rəhbəri general Cozef Danford isə bildirib ki, hazırda ABŞ üçün beş əsas problemi var - bunlar Rusiya, Çin, İran, Şimali Koreya və ekstremist təşkilatlardır.

Rusiya tərəfi isə ABŞ-ın ölkədə rəhbərliyi dəyişmək niyyətində olduğunu iddia edir.  Bu fikri rejissor Oliver Stouna müsahibəsində Rusiya prezidenti Vladimir Putin bəyan edib.

Vladimir Putin müsahibədə belə bir niyyətin və siyasətin mövcudluğu mümkün sayır: "Əgər doğrudan da belədirsə, Rusiyaya qarşı bu cür yanaşma gələcəyə köklənməyib. Bu fikirdə olanlar azı 25-50 il irəliyə nəzər yetirmirlər. Əks halda Rusiya ilə münasibətləri başqa cür qurar, Rusiyanı özlərinin vassalına çevirməyə can atmazdılar”.

Beləliklə, hər iki tərəfin qarşı-qarşıya gəldiyi Yaxın Şərq bölgəsində toqquşmalar qızışa bilər. Bu hadisələr Cənubi Qafqaz bölgəsinə də yayıla bilər və ABŞ-ın əsas strateji tərəfdaşı Türkiyə də qarışa bilər. Bunun isə istər-istəməz Qarabağ münaqişəsinə təsir ola bilər. Yəni Azərbaycan yeni dünya müharibəsi teatrının ortasına düşə bilər.