İrandan Naxçıvana mal buraxılmır

Artıq bir neçə gündür əhalinin şəxsi istifadəsi üçün İran İslam Respublikasından gətirdiyi ərzaq məhsullarına Culfa Gömrük Keçid məntəqəsində qadağa qoyulub.  “Vətəninfo.az”ın  RATİ-nin yaydığı məlumatda istinadən yaydığı xəbərə görə, İran tərəfdən naxçıvanlıların ərizaq məhsulları gətirməsinə məhdudiyyətlər olmasada, Culfa gömrükçüləri əhalinin gətirdiyi ərzaq məhsullarını ya anbara vurur ya da əhali özü gətirdiyi məhsulları Araz çayına atırlar. Artıq hər iki Culfanı birləşdirən, Araz çayı üzərində yerləşən körpünün altında çoxlu miqdarda atılmış ərzaq məhsulu yığışıb. Əhaliyə isə bunun hansı səbəbdən edildiyi açıqlanmır.  “Bir neçə ildir ucuz olduğu üçün ailəmizin şəxsi istifadəsinə  lazım olan ərzaq və sənaye məhsullarının çoxunu İrandan alıb gətirirdik. Bu bir çox vətəndaşın  ailəsinin dolanışıq yeri idi.  Indi bunu da qadağan edirlər. Vəziyyətimiz necə olacaq bilmirik. Açıqlama vermirlər. Sadəcə gömrükçülər olmaz deyərək, gətirdiklərimizi geri qaytarmağı və ya ambara vurmağı tələb edirlər” bunları RATİ-nin Naxçıvandakı müxbirinə danışan Naxçıvan sakinlərindən Elxan Məmmədov onu da əlavə edib ki,əhalinin çoxu isə əsəbləşərək gətirdiklərini körpüdən aşağı atır. RATİ-nin müxbiri məsələ ilə bağlı MR Dövlət Gömrük Komitəsində olaraq mətbuat xidmətinin rəhbəri ilə görüşmək istəsələrdə, cəhdləri baş tutmayıb. Mətbuat xidmətinin rəhbəri Rail Tahirli müxbirlərlə görüşməkdən və sualları cavablandırmaqdan imtina edib.