“Liviyada niyə vətəndaş müharibəsi baş verir?” politoloq Natiq Miri şərh edir

Liviyada bütün bölgələr müxtəlif aşirətlərin nüfuz dairəsində olub və bu gün də qalmaqdadır. 

Bu sözləri “Vətəninfo.az”a Azərbaycan Milli Strateji Təhqiqatlar Mərkəzinin sədri,  siyasi şərhçi Natiq Miri Liviyada baş verən daxili savaşın səbəblərini şərh edərkən bildirib: “Bundan başqa, devrilmiş Qəddafi rejimindən sonra yeni bir sistem hələ oturuşmayıb və bu kontekstdə bütün aşirətlərin maraqları tam təmin olunmayıb. Bu gün hər tayfa başçısı daha yağlı tikə almaq iddiasındadır. Bundan ötrü də ciddi çatışma gedir. Orada idarəetmə sistemi oturuşana  və hər şey bəlli olana qədər bu cür qanlı proseslər davam edəcək”-deyə, politoloq vurğuladı.

Politoloq onu da əlavə etdi ki, bu gün Liviyada bütün tərəfləri nüvəyə bağlayacaq ciddi bir mərkəzi hakimiyyət yoxdur: “Bu, olanadək bu cür separat çatışmalar, meyllər davam edəcək. Digər tərəfdən, Liviyada hələ də Qəddafi tərəfdarları var ki, onlar vəziyyətin dəyişməsi ilə razı deyillər və qisas almağa çalışırlar. Bütün bunların tənzimlənməsi üçün möhkəm mərkəzi dövlət lazımdır. Bunun üçünsə, demokratik seçkilər keçirməklə hakimiyyətin müstəqil qollarını yaratmaq, cəmiyyətin bütün təbəqələrinin hakimiyyətdə iştirakını təmin etmək, ciddi iqtisadi islahatlar və cəmiyyətin təhlükəsizliyini təmin edən bir sistem yaratmaqla insanların dövlətə inamını, etibarını qazanmaq olar. Hələlik isə bu yöndə proses çox ləng gedir”-deyə, Natiq Miri qeyd etdi.

Elnur Eltürk