“Mitinq Çingiz”in qəddarlığı ölkəmizə 7500 avroya başa gəldi

AZƏRBAYCAN YENƏ CƏRİMƏLƏNDİ

Avropa İnsan Haqları Məhkəməsi Azərbaycanla bağlı növbəti qərarını açıqlayıb. 

Veteninfo.az-ın APA-ya istinadən verdiyi xəbərə görə, Hüquq Maarifçiliyi Cəmiyyətinin sədri İntiqam Əliyev açıqlamasında deyib ki, “Azadlıq” qəzetinin keçmiş əməkdaşı Sarvan Rizvanovun iddiası əsasında çıxarılan qərarda məhkəmə onun Avropa İnsan Hüquqları Konvensiyasının 3-cü maddəsi ilə təminat verilən hüququnun pozulduğu qənaətinə gəlib. 

Qərara əsasən, Azərbaycan hökuməti S. Rizvanova mənəvi ziyana görə 4500 avro, məhkəmə xərclərinə görə isə 3000 avro ödəməlidir. 

Qeyd edək ki, S. Rizvanov 2005-ci il noyabrın 9-da “Azadlıq” blokunun “20 Yanvar” metrosundan Dövlət Film Fondunun qarşısına kimi nəzərdə tutulan marşrutda icazəli keçirilən yürüş-mitinqi zamanı foto-çəkiliş apararkən Yasamal Rayon Polis İdarəsinin rəis müavini, polis polkovniki Çingiz Məmmədov tərəfindən zorakılığa məruz qaldığını iddia edib. 

Onun ölkədaxili məhkəmələrdə həm cinayət, həm də mülki icraat qaydasında qaldırdığı şikayətlərin hamısı rədd olunub. Jurnalistin pis rəftara məruz qalmaq və digər hüquqlarının pozuntusu ilə bağlı şikayəti 2006-cı ilin iyulunda Avropa İnsan Hüquqları Məhkəməsinə göndərilib. 

Qeyd edək ki, müxalifət mətbuatının “Mitinq Çingiz” adı verdiyi rəis müavini bir neçə il əvvəl təqaüdə göndərilib.