“Rəsul Quliyevdən mənə heç bir təklif gəlməyib”

Sülhəddin Əkbər sədr olmaq niyyətinin olmadığını deyir .

Dünən mətbuatda eks-spiker Rəsul Quliyevin Avroatlantik Şuranın sədri Sülhəddin Əkbəri lideri olduğu Açıq Cəmiyyət Partiyasına gətirmək niyyəti olması ilə bağlı məlumat yayıldı. Daha doğrusu, “Reytinq” qəzetinin yaydığı məlumatda deyilirdi ki, Rəsul Quliyev ACP-nin hazırkı sədri Vaqif Mahmudovun fəaliyyətini yetərli saymayaraq, onun yerinə siyasi proseslərdə daha çox təcrübəsi olan bir şəxsi gətirmək istəyir. 

Qəzetin məlumatına görə, eks-spiker Sülhəddin Əkbərin ACP sədri olmasına çalışır.

Ancaq mühacir eks-spiker “Azadlıq” qəzetinə verdiyi müsahibəsində bunu inkar edib: “Sülhəddin Əkbərə Açıq Cəmiyyət Partiyasının sədri olmağı təklif etməmişəm”. 

R. Quliyev, Sülhəddin Əkbərin Azərbaycan siyasətində hörmət etdiyi şəxslərdən biri olduğunu deyib: “Ona görə də bu gün ona partiya sədri olmağı təklif etməməyim o demək deyil ki, gələcəkdə bu baş verməyə bilər”.

Avroatlantik Şuranın sədri “Vətəninfo.az” saytına açıqlamasında bildirdi ki, eks-spiker Rəsul Quliyev tərəfindən ona belə bir təklif gəlməyib: “Əgər belə bir təklif olarsa, bununla bağlı hansısa qərarı yaxın ətrafımla aparacağım müzakirələrdən sonra verəcəm. Hazırda isə mənim belə bir niyyətim yoxdur”.

Rövşən Ziya