Səfirliyimizin ailələri Dəməşqdən çıxarılıb

30 azərbaycanlı tələbə hələ də Suriyadadır

Aprelin 12-də Suriyada qüvvəyə minən atəşkəs rəsmən davam etsə də, toqquşmalar və partlayışların arası kəsilmir. “Veteninfo.az”-ın xarici saytlara istinadən verdiyi məlumata görə, bu gün səhər saatlarında Dəməşqdə güclü partlayış olub. Kabun məhəlləsindəki partlayışın səsinin bütün şəhərdə eşidildiyi bildirilib. Partlayışla bağlı hələlik heç bir açıqlama verilməyib. Suriya ordusunun Humsu tank atəşi altında saxladığı və geri çəkilmədiyi bildirilir. Müxalifət Humsda həbslərin həyata keçirildiyini və 3 nəfərin öldüyünü bəyan edib. Azərbaycan Xarici İşlər Nazirliyinin mətbuat katibi Elman Abdullayev bildirib ki, Azərbaycanın Suriyadakı səfirliyinin əməkdaşlarının ailələri təhlükəsizlik məqsədilə Dəməşqdən çıxarılaraq Vətənə göndərilib. Qurum rəsmisinin bildirdiyinə görə, Azərbaycandan Suriyada təhsil alan 60-dək tələbə səfirliyin qeydiyyatında olub, hazırda isə 30-dək tələbə Suriyada qalıb. Səfirlik onlarla daim əlaqə saxlayır, vəziyyətləri ilə maraqlanır. Suriyada təhsil alan tələbələrə tövsiyyə olunur ki, ölkədə vəziyyət sabitləşənə qədər Azərbaycana qayıtsınlar.