“Yüz faiz əminəm ki...”

 “Qarşıdan gələn 2013-cü il prezident seçkilərində prezidentliyə yeganə namizədimiz Azərbaycan xalqının böyük əksəriyyətinin birmənalı dəstəyinə malik olan dövlət başçısımız İlham Əliyev olacaq. Partiyamız  növbəti dəfə ölkə Prezidentinin namizədliyi irəli sürəcək və onun qələbə əldə etməsi üçün bütün qüvvəsini səfərbər edəcək”.

“Vətəninfo.az”-ın məlumatına görə, bunu “525”-ə açıqlamasında Yeni Azərbaycan Partiyasından (YAP) olan millət vəkili Kamilə Əliyeva dilə gətirib. Millət vəkilinin qeyd etdiyinə görə, Azərbaycan xalqı 2003 və 2008-ci illərdə olduğu kimi, 2013-cü il seçkilərində də düzgün seçim edəcək, özündən olan namizədi dəstəkləyəcək:
“Mən yüz faiz əminəm ki, müdrik və qədirbilən xalqımız yenə də öz seçimini düzgün edəcək. YAP sədri, ümummilli lider Heydər Əliyev siyasətinin layiqli davamçısı, indiki dövlət başçımız İlham Əliyev növbəti dəfə Azərbaycan xalqının, seçicilərin böyük əksəriyyətinin dəstəyi ilə ölkə Prezidenti seçiləcək”.

K.Əliyeva deyib ki, buna heç kimin zərrə qədər belə şübhəsi olmasın və ola da bilməz.
 “Onu da deyim ki, şəxsən mən özüm  bir millət vəkili kimi seçicilərlə görüşlərimdə İlham Əliyevin xalq arasında necə böyük nüfuza malik olduğunu görmüşəm və xalqın onu necə dəstəklədiyini hiss etmişəm. Odur ki, budəfəki prezident seçkilərinin də birmənalı və şəriksiz qalibi ölkə Prezidenti olacaq”- deyə, millət vəkili sözlərinə əlavə edib.

Vətəninfo.az”