Azərbaycan Türkiyə əlaqələri müzakirə olundu

Mətbuat Şurasının sədri Əflatun Amaşov Türkiyə Mətbuat Şurası dərnəyinin rəhbəri Tamər Atabarutla görüşüb. Mətbuat Şurasının ofisində baş tutan görüşdə hər iki qurum arasında əlaqələrin hazırkı vəziyyəti müzakirə olunub. 

Mətbuat Şurasından “Vətəninfo.az” a daxil olan məlumata görə, Şura sədri Əflatun Amaşov bildirib ki, rəhbərlik etdiyi qurumun beynəlxalq təmaslarının qurulmasında Türkiyə Mətbuat Şurası ilə münasibətlər mühüm rol oynayıb. 

O, Mətbuat Şurasının fəaliyyət istiqamətləri ilə bağlı da ətraflı məlumat verib.

Tamər Atabarut son illər Azərbaycan və Türkiyənin media qurumları arasında əlaqələrin artdığına diqqət çəkib. Bunu hər iki ölkənin ortaq maraqlarının ifadəsi baxımından faydalı tendensiya kimi dəyərləndirən Türkiyə Mətbuat Şurası dərnəyinin rəhbəri mövcud istiqamətdəki fəaliyyətin daha da gücləndirilməsini zəruri sayıb. 

Görüşdə Mətbuat Şurası və Türkiyə Mətbuat Şurasının medianın özünütənzimləməsi sahəsindəki təcrübə mübadiləsinin dərinləşdirilməsi yolları ətrafında fikir mübadiləsi aparılıb. Hər iki ölkə jurnalistlərinin qarşılıqlı təmaslarının gücləndirilməsi məqsədilə birgə konfransların, Azərbaycandan Türkiyəyə, Türkiyədən Azərbaycana səfərlərin təşkili qərara alınıb. Görüşdə media təhsili sahəsində də əməkdaşlığın prioritet istiqamətlərinə dair də diskussiyalar aparılıb.

Mirvari Nəcəf