Bakıdan Türkiyəyə qatarla getmək olacaq

Sərnişin və yük lokomotivlərinin yenilənməsi istiqamətində 2016-2018 illər proqramına əsasən dəmiryol nəqliyyatında yenidənqurma işlərinə start verilib.

Vətəninfo.az ANS TV-yə istinadla xəbər verir ki, bunun üçün artıq Bakıya bu il ikimərtəbəli qatar gətirilib. Yeni qatarların hərəkəti üçün energetika və rabitə, siqnalizasiya xətləri yenilənir. Bu işlər isə Böyük- Kəsik stansiyasından başlayaraq Bakıya qədər həyata keçirilir. Yenilənən dəmiryol xətti bir dispetçer pultu vasitəsilə idarə olunacaq. Bu işlərdən sonra 50 ədəd dəyişən cərəyanlı yük və sərnişin lokomotivlərini də dəmiryol relslərində görmək olacaq.
“Azərbaycan Dəmiryolları”Qapalı Səhmdar Cəmiyyətinin mətbuat xidmətinin rəhbəri Nadir Əzməmmədovun dediyinə görə, bütün bu işlər çərçivəsində gələn il Qazaxıstandan 10 ədəd manevr tipli teplovoz gətiriləcək ki, onlar da yalnız stansiyalar arasında fəaliyyət göstərəcək.
Bundan əlavə, ölkəyə 300 ədəd yeni yük vaqonları gətirilib. Daha 30 ədəd Avropa standartlarına cavab verən sərnişin vaqonlarının gətirilməsi nəzərdə tutulur. Bu işlər başa çatdırılandan sonra, gələn il Türkiyəyə sürətli qatar vasitəsilə gedib-gəlmək mümkün olacaq.