Dərdim mənim oğul balam

Bu nağılın sonu gəldi,

Gəlib çatdı yol gözümə.

Göydən iki bulud düşdü,

Sağ gözümə, sol gözümə.

Bir cüt ekiz bulud gözün,

Əlində qaldım, daraldım...

Yolumdakı qara daşlar

Qara günümdən qaraldı.

Göz yaşlarım yanağıma

Ayaq açıb yeriyəcək.

Dərdim mənim oğul balam,

Nəsil-nəsil törəyəcək

-----

Göz yaşım əllərin kimi…

Mən səni düşünən kimi,

Boğazıma qəhər gəlir.

Axı unutdum deməyə

Dodağım nэ təhər gəlir.

Sən ömrüm boyunca mənim,

Boşalıb-dolan gözlərim.

Geriyə dönən ayağım,

Arxada qalan gözlərim.

Sığal çəkir yanağıma,

Göz yaşım əllərin kimi.

Əlim çatmaz, səsim yetməz,

Uzaqsan illərim kimi.

Haradasan,hayandasan?!

Çağır gəlim yaxınına.

Göz yaşımı sel eyləyib,

Düşmüşəm axınına.

-----

Lap təzədən…

Gözünü yumub açasan,

Əllərinə bir əl düşə.

Yaşın da o yaş olmaya,

10-15 il əvvəl düşə.

Qayıdasan, axır yolun

Yollarının başı ola.

Göxlərindən axab yaş da

Ömrün-günün qışı ola.

Ağladıqca, ağladıqca,

Durulasan, durulasan.

Sevməmiş qız ürəyinlə

Lap təzədən vurulasan.

Laaap təzədən vurulasan.

--

Pəncərə

Külək əsir pəncərəmdə,

Ağacların kölgə-kölgə

ruhu gəzir pəncərəmdə,

qorxu gəzir pəncərəmdə...

Pəncərəmdən çöl görünür,

Uzun,arıq yol görünür.

Bu çöllərin adamı yox,

Ümid hanı, o damı yox?!

Xatirələr dul görünür.

Ömrü il-il ötürürəm,

Səhər gəlir, axşam düşür.

Tanrı yandırır şamını,

Göy üzündən ay şam düşür.

Ay şam düşür ürəyimə,

Ürək ala qaranlıqdı.

Səndən nə ömür qalıbsa, 

Sənsiz üzü o yanlıqdı.

Pəncərəmin çölü sənsiz,

Pəncərəmin içi sənsiz.

Bilsən necə darıxıram,

Bilsən, sənin üçün, sənsiz...