Postsovet Ermənistanının ilk prezidenti Levon Ter-Petrosyan, əslən suriyalı olsa da, siyasətə "Qarabağ” komitəsinin rəhbəri kimi atılmışdı. Sonralar əslən Dağlıq Qarabağdan olan bir çox erməni ildırım sürəti ilə siyasi karyera qurub. Ermənistanın 2-ci prezidenti Robert Köçəryan onların başında gəlir. O, 10 il – 1998-ci ildən 2008-ci ilədək Ermənistana rəhbərlik edib.

Ermənistan hakimiyyətinin məşhur qarabağlılarından biri də keçən həftəyədək müdafiə naziri vəzifəsini tutan Seyran Ohanyandır. O, burada nazir olmazdan öncə Dağlıq Qarabağda - "DQR”də hərbi işlərə rəhbərlik edib.

Prezident Serj Sarkisyan iş həyatına Qarabağda başlayıb. Hələ sovet dönəmində Azərbaycanın Dağlıq Qarabağ Muxtar Vilayətinin komsomol, partiya strukturlarında çalışıb. Qarabağda savaş gedərkən - 1993-1994-cü illərdə Ermənistanın müdafiə naziri postuna gətirilib. Azərbaycanla Ermənistan arasında atəşkəs imzalanarkən də, həmin vəzifədə olub.

Dağlıq Qarabağ konflikti Ermənistanın indiki tarixində istər hakimiyyət olimpinə yüksəlməkdə, istərsə oradan aşağı yuvarlanmaqda həlledici rol oynayıb. Elə ölkənin ilk prezidenti Levon Ter Petrosyanın istefası da bu konfliktdən qaynaqlanıb. Onun bu münaqişədə tutduğu mövqe millətçi ehtiraslara qapılmış Ermənistan cəmiyyətində ya yumşaq sayılıb, ya da təslimçilik kimi qəbul edilib.

1990-cı illərdə və 2000-ci illərin əvvəllərində Ermənistan siyasi elitasının xeyli hissəsi qarabağlılardan ibarət olsa da, son vaxtlar "qarabağlılıq” yadırğanmağa başlanmış - Serj Sarkisyanın ətrafında Dağlıq Qarabağdan çıxmayan xeyli yeni şəxs toplanmışdı. Dördgünlük aprel savaşı hər şeyi yenidən "yerliçilik” axarına qaytarıb.

Yeni baş nazir Karen Karapetian 2010-2011-ci illərdə Yerevanın meri olub. Sonra Rusiyaya gedərək, orada biznes aləminə baş vurub və "Qazprom”un rəhbərliyində çalışıb. O da əslən Dağlıq Qarabağdandır.

Müdafiə naziri postuna mülki şəxsin təyin edilməsi 2-ci mühüm yenilik sayıla bilər. Yeni müdafiə naziri Prezident Aparatının sabiq rəhbəri Vigen Sarkisyandır. O, qarabağlı deyil. Ancaq müdafiə naziri mülki şəxs olandan sonra əsas hərbi vəzifə silahlı qüvvələrin baş qərargah rəisi vəzifəsidir. Bu vəzifəyə isə sentyabrın 3-də Movses Akopyan təyin olunub. Dağlıq Qarabağın Martuni rayonunda doğulan M. Akopian 2007-2015-ci illərdə tanınmamış "DQR”in müdafiə naziri çalışıb. Beləcə, Ermənistanda prezident, baş nazir və ali hərbi vəzifənin qarabağlıların əlində cəmləşmə prosesi başa çatıb./azadlıq.org/