Poroşenkodan xoş xəbər

Nadejda Savçenkonun azad edilməsi barədə razılıq əldə olunub

Minskdə keçirilən 16 saatlıq danışıqlar nəticəsində Rusiyada həbsdə saxlanılan Ukrayna Hava Qüvvələrinin baş leytenantı, helikopter pilotu Nadejda Savçenkonun azad edilməsi barədə razılıq əldə olunub. ANS PRESS-in məlumatına görə, bunu Ukrayna prezidenti Petro Poroşenko açıqlayıb.

Onun azad edilməsinin detalları hələ bilinmir.

Vəkil Nikolay Polozov da qeyd edib ki, Savçenkonun azad edilməsinin bir necə yolu var. "Mən bu razılığın əldə edilməsindən çox şadam. Biz onunla bu gün, ən uzağı sabah görüşəcəyik və bu məsələ müzakirə ediləcək. O amnistiya, dəyişdirmə yolu ilə buraxıla bilər. Bundan başqa deyə bilərlər ki, səhv edilib və cinayəti başqa şəxs edib".

Xatırladaq ki, “Normandiya dördlüyü” – Ukrayna, Rusiya, Fransa və Almaniya rəhbərlərinin Belarusun paytaxtı Minsk şəhərində görüşü baş tutub. 16 saat davam edən görüşdə Donbass probleminin həlli üzrə danışıqlar aparılıb.

Görüşdən sonra Rusiya prezidenti Vladimir Putin atəşkəs haqqında razılıq əldə edildiyini açıqlamışdı.