QƏNİRƏ PAŞAYEVA: “TORPAQLARIMIZI ÖZÜMÜZ HƏRBİ YOLLA AZAD EDƏCƏYİK”

Milli Məclisin 1 may iclasında, Şuşanın işğalının 20-ci ili ilə bağlı müzakirələrdə danışan deputat Qənirə Paşayeva bu şəhəri Azərbaycanın döyünən qəlbi saydığını deyib. Deputat türk dövlətlərinə səslənib: “Türk dövlətləri Şuşanın işğalının 20-ci ildönümü ilə bağlı bəyanat versinlər. İslam Konfransı Əməkdaşlıq Təşkilatından da mövqe gözləyirik. Onlar tək açıqlama, bəyanat verməməli, Ermənistanla əlaqələrinə yenidən baxmalıdırlar.

YUNESKO-ya çağırış edirəm. Şuşada azərbaycanlıların izlərini silməyə, qəbiristanlıqlarımızı dağıtmağa çalışırlar. Mədəni soyqırımı gedir. Beynəlxalq təşkilatların torpaqlarımızı işğaldan azad edəcəyinə inanmırıq. Torpaqlarımızı özümüz hərbi yolla azad edəcəyik. Mən bir vaxt jurnalist olanda ermənilərin təmsilçisi demişdi ki, Şuşasız azərbaycanlıların sayı azalacaq, Şuşada doğulan ermənilərin sayı artacaq və bu, ermənilərin lehinə işləyən amil olacaq. Mübariz İbrahimov göstərdi ki, Biləsuvarda doğulan gənclərimiz də torpaqlarımızı unutmur”.

Deputat Azərbaycanın işğal olunmuş əraziləri ilə bağlı qanun qəbul etməyə çağırıb.