Qətnamənin müəllifi Azərbaycan Milli İstiqlal Partiyasıdır

Tarix: 16.04.2012 11:40
Baxış sayı: 372

Beyrutda Dağlıq Qarabağ münaqişəsi ilə bağlı yeni qətnamə...

Sənəddə Ermənistanın Azərbaycana qarşı işğalçılıq faktları qeyd olunub

Aprelin 13-də Beynəlxalq Gənc Demokratlar İttifaqının (İYDU) İdarə Heyətinin Livanın paytaxtı Beyrutda keçirilən toplantısında Dağlıq Qarabağ münaqişəsi ilə bağlı yeni qətnamə qəbul olunub.

AMİP mətbuat xidmətindən Vətəninfo-ya verfilən məlumata görə, bu qətnamənin müəllifi partiya rəhbərliyidir.

Məlumatda bildirilir ki, hələ bir müddət əvvəl qətnamə layihəsi AMİP tərəfindən hazırlanıb və BGDİ-də qəbul olunması məqsədi ilə Təşkilatın İdarə Heyəti üzvlərinin müzakirəsinə təqdim edilib.

AMİP Beynəlxalq əlaqələr katibi Elşən Mustafayev həmçinin BGDİ-nin İdarə Heyətinin Fəxri üzvü olaraq Beynəlxalq Gənc Demokratlar İttifaqının İdarə Heyətinin Beyrutda keçirilən toplantısına qatılıb və sənədin qəbulunda bilavasitə iştirak edib.

Partiyadan verilən məlumata görə, bu ildən etibarən Ermənistanın hakim partiyasının gənclər təşkilatı da BGDİ-nin üzvüdür. Bu faktı və Livan ermənilərinin Ermənistanın siyasi və ictimai həyatında böyük təsirə malik olduğunu nəzərə alsaq, Dağlıq Qarabağla bağlı Qətnamənin Livanda qəbul edilməsi siyasi baxımdan Azərbaycan üçün çox əhəmiyyətlidir.

Qətnamədə erməni vəhşilikləri, həmçinin Dağlıq Qarabağ və ətrafındakı yeddi rayon daxil olmaqla, Azərbaycan torpaqlarının 20 faizinin işğal altında olması faktı öz əksini tapıb. Sənəddə Münaqişə nəticəsində təxminən 25000 adamın həlak olduğu, bir milyona yaxın Azərbaycan vətəndaşının ev-eşiyini itirərək qaçqın həyatı yaşadığı xüsusi vurğulanıb.

Həmçinin, BMT Təhlükəsizlik Şurasının 1993-cü ildə qəbul etdiyi 822, 853, 874 və 884 saylı dörd Qətnaməsi, həmçinin Avropa Şurası Parlament Assambleyasının 2005-ci il 25 yanvar tarixli 1416 saylı və Avropa Parlamentinin 2010-cu il 20 may tarixli Qətnamələri qeyd olunmaqla bu altı qətnamədə bəyan edilən şərtlərə məhəl qoyulmadığı və Ermənistan tərəfindən işğal olunmuş ərazilərin hələ də işğal altında olması faktı vurğulanıb.

Beynəlxalq hüquqa görə, Dağlıq Qarabağın və yeddi ətraf rayonun Azərbaycan Respublikasının bir hissəsi olması xüsusi qeyd olunub və bildirilib ki, beynəlxalq birlik ayrılma cəhdini pisləyir və onu qanunsuz hesab edir.

Son olaraq Qətnamədə deyilir: “Biz BMT, Avropa Birliyi və Avropa Şurasını Dağlıq Qarabağ və yeddi ətraf rayon ətrafında münaqişənin sülh yolu ilə, beynəlxalq hüquqa əsasən həlli və qəbul etdikləri qətnamələrin yerinə yetirilməsi üçün səylərini gücləndirməyə çağırırıq. Biz Avropa Birliyini Minsk Qrupunda Fransanı əvəz etməklə münaqişənin həllində birbaşa rol oynamağa və status quo-dan mərhələli şəkildə çıxmağa yardım etməyə çağırırıq. Avropa Birliyi həmçinin Şərq Tərəfdaşlığı, AVRONEST PA çərçivəsində Ermənistan və Azərbaycan arasında siyasi və iqtisadi əməkdaşlıq üçün imkan yaratmalıdır. Biz BMT Təhlükəsizlik Şurasını bir daha mövqeyini nəzərdən keçirməyə və beynəlxalq hüququn qorunmasında liderliyini göstərməyə çağırırıq”.

Məlumat üçün bildirək ki, dünyanın 80-dən artıq ölkəsindən 127 siyasi təşkilat Beynəlxalq Gənc Demokratlar İttifaqında təmsil olunur. O cümlədən Azərbaycan Respublikasından yalnız AMİP Gənclər Təşkilatı 1997-ci ildən BGDİ-nin tamhüquqlu üzvüdür.