"Mənim siyasətə gəlişim hamının gəlişinə bənzəmədi"

“Vətəninfo.az” xəbər verir ki, bu sözləri millət vəkili İqbal Ağazadə Facebookdakı şəxsi səhifəsində yazıb:

“Mənim siyasətə gəlişim heç də hamının gəlişinə bənzəmədi – partiya sədrləri içərisindən heç kimin taleyinə oxşamadı. Nə xalq hərəkatı məni liderə çevirmədi, nə də istefa verib getdiyim vəzifə kürsüsünün imkanlarından yararlanıb partiya qurmadım.

Heç məndən əvvəlkilərin yaratdıqları ideoloji bazaya da söykənmədim. Kiçik bir qrupla başımızı aşağı salıb doğru bildiklərimizi addım-addım gerçəkləşdirdik. Bu gün böyük bir partiyanın başında dayanıram – kimlərinsə xoşuna gəlsə də, gəlməsə də. Bu gün Azərbaycan siyasətində "Ümid” həqiqəti var. Kimsə danmağa qalxmasın bu həqiqəti. Danışanda müzakirə edilən, susanda sual qınağına tuş gələn, seçkilərdə iştirakından məmnun və ya narazı qalan "Ümid" həqiqəti... nələr görmədim bu yolda?

Rahat parlament kürsüsü də, həbsxana köşəsi də, Qarabağ müharibəsi də, işgəncə, repressiya, qınaq, tənqid, bəzən təhqir də...”