Sabunçu qəsəbəsində susuzluq

Problemlə əlaqədar prezidentə müraciət gönədrildi

Aprelin 9-dan Sabunçu qəsəbəsinin M.Aydınbəyov küçəsində yerləşən mənzillərə içməli suyun verilməsi dayandırılıb. Bu barədə  “Vətəninfo.az”a həmin qəsəbənin sakini, Aydınbəyov 13 ünvanında yaşayan jurnalist Cəsur Sümərinli məlumat verib. Onun sözlərinə görə, su kəsilərkən əhaliyə hər hansı xəbərdarlıq edilməyib və bu səbəbdən sakinlər hər hansı ehtiyat tədbiri görməyiblər.

Bu gün C.Sümərinli məsələyə aydınlıq gətirmək üçün Sabunçu rayonu su idarəsi ilə əlaqə saxlayıb. 425-53-50 saylı telefonun dəstəyini qaldıran növbətçi su xətlərində təmir getdiyini və suyun bir neçə gündən sonra əhaliyə veriləcəyini bildirib.

“Azərsu” ASC-nin dispetçer xidmətinin 511-75-68 saylı telefonla adının çəkilməsini istəməyən növbətçi isə bildirib ki, su sakinlərə sabah veriləcək. C.Sümərinlinin sözlərinə görə, sabah Sabunçu qəsəbəsinə suyun veriləcəyi inandırıcı deyil. Onun sözlərinə görə, havalar isti keçdiyindən suyun verilməməsi qəsəbə sakinlərinin narazılığına səbəb olub. “Görünür bu isti yaz günlərində kimsə sakinlərin heysiyyatı ilə oynamaq fikrinə düşüb”, - deyə o bildirdi. C.Sümərinli problemlə əlaqədar ölkə prezidenti İlham Əliyeviə elektron poçtu vasitəsilə müraciət etdiyini də bildirdi.