“Silah alınması məsələsini müsbət dəyərləndirirəm”

Türkiyədən müxtəlif tipli hərbi nəqliyyat vasitələrini alınmasına “Vətəninfo.az” saytına münasibət bildirən hərbi ekspert Üzeyir Cəfərov bildirib ki, Azərbaycan qardaş Türkiyədən bir sıra hərbi ləvazimatlar alıb: “ Əvvəllər bu tipdə olan xəbərlər ictimaiyyətə açıqlanmırdı, son vaxtlar isə müxtəlif mənbələrdən ictimaiyyətin diqqətinə çatdırılır. Eyni zamanda bu xəbərlər bir ajiotajın da yaranmasına gətirib çıxarır ki, nəyə görə Azərbaycan Türkiyədən hansısa hərbi texnikaları alır? ”-deyə qeyd edib. Ekspert qeyd edib ki, Türkiyədən indiyə qədər də xüsusən də, Naxçıvanda olan hərbi birləşməyə “Land Rover” markalı müasir avtomobillər alınıb. Müdafiə Nazirliyinin tərkibində olan hərbi hissələrə Türkiyədən xeyli sayda təkərli texnika gətirildiyini bildirən ekspert əlavə edib ki, Türkiyə istehsalı olan rabitə avadanlıqları, “Asel Xan” , “Rakel Xan” şirkətlərinin istehsalı olan məhsullar Azərbaycan Silahlı Qüvvələrində istifadə olunur. Türkiyədən silah alınması məsələsini müsbət dəyərləndirən ekspert hesab edir ki, bunun ardı da gəlməlidir.” Nəzərə alsaq ki, Türkiyə NATO-nun aparıcı dövlətlərindən olan bir ölkə kimi onu istifadə etdiyi texnikalardan Azərbaycan da yararlanmalıdır. Bu da bir örnəkdir ki, iki ölkə arasındakı münasibətlər təkcə iqtisadi, siyasi, mədəni, formada deyil, həm də hərbi istiqamətdə inkişaf edir”-deyə, fikrini tamamlayıb.

Ramilə