"Qarabağ”ın Avropa Liqasındakı rəqibi "Yanq Boyz”da gözlənilməz hadisə baş verib.

Vətəninfo.az xəbər verir ki, Apasport.az-ın İsveçrə mətbuatına istinadən məlumatına görə, Bern təmsilçisi baş məşqçisi Uli Forte ilə yollarını ayırıb.

 UEFA Çempionlar Liqasının III təsnifat mərhələsində "Monako”ya hər iki görüşdə məğlub olan (1:3, 0:4) "Yanq Boyz” Avropa Liqasına yuvarlanmışdı. Məhz bu yenilgi baş məşqçinin istefa verməsinə səbəb olub.

 Paytaxt klubunun idman direktoru Fredi Bikel də artıq məlumatı təsdiqləyib. O bildirib ki, "Qarabağ”la matça qədər yeni çalışdırıcılarını müəyyənləşdirəcəklər: "Biz Forte ilə yollarımızı ayırmaq fikrində deyildik. Ona fikrini dəyişmək üçün vaxt da vermişdik. Lakin uzun müddət gözləyə də bilmərik. Çünki həm çempionat start götürüb, həm də qarşıda "Qarabağ”la ağır oyunlarımız var. Hələlik komandanı Fortenin köməkçisi Harald Qamperle çalışdıracaq. Qarşıdakı çempionat matçlarında o komandaya qələbələr qazandırsa, baş məşqçi kimi təsdiqlənə də bilər”.

 Qeyd edək ki, "Qarabağ”ın "Yanq Boyz”la oyunları avqustun 20-də və 27-də baş tutacaq.