Yunanıstan parlamenti ölkə prezidentini seçə bilmədi

Dekabrın 29-da Yunanıstan parlamentində keçirilən seçkilərin yekun - üçüncü turunda da ölkə prezidenti seçilməyib.

Yeganə namizəd olan sabiq ətraf mühitin mühafizəsi üzrə Avropa komissarı Stavros Dimasa 300 deputatdan yalnız 168-i səs verib. Prezident olmaq üçün S.Dimas 180 səs qazanmalı idi.

Yunanıstan Konstitusiyasına görə, prezident seçilmədiyi halda parlament buraxılır və yeni parlament seçkiləri elan olunur. Keçirilən sorğulara görə, heç bir partiya seçicilərin tam dəstəyini və hökuməti formalaşdıra bilməyəcək. Bu isə ölkəni siyasi və iqtisadi böhrana düçar edə bilər. Parlamentdə keçirilən prezident seçkiləri zamanı yunan şirkətlərinin səhmləri birjada 11 faiz aşağı düşüb.