Bayraq Meydanının keçmiş rəisi: “Mən erməni deyiləm”

İşgəncələrə Qarşı Azərbaycan Komitəsinin sədri Elçin Behbudov bu gün həbsdə olan Dövlət Bayrağı Meydanının keçmiş rəisi, “Azİmport” şirkətinin sahibi Rəşad Məmmədovla görüşüb.

Vətəninfo.az xəbər verir ki, Elçin Behbudovun virtualaz.org-a verdiyi məlumata görə, görüş Milli Təhlükəsizlik Nazirliyinin təcridxanasında keçirilib.
“Təcridxanada saxlanılan 1971-ci i təvəllüdlü Rəşad Rəfael oğlu Məmmədovla görüşdüm. Görüş zamanı onun saxlanma şəraitilə tanış oldum. Saxlanılan bildirdi ki, ona qarşı heç bir zorakılıq və təzyiq olunmur. O, istintaqın gedişatından narazı olmadığını da qeyd etdi”, - deyə Elçin Behbudov bildirib.
Hüquq müdafiəçisi bildirib ki, Rəşad Məmmədov söhbət zamanı ermənilərlə qohumluğu barədə deyilənləri təkzib edib: “Dedi ki, barəsində deyilənlər yalandır, onun heç bir erməni qohumu yoxdur”.
Qeyd edək ki, Bayraq Meydanının keçmiş rəisi əvvəlcə işdən çıxarılıb, sonra isə həbs olunub. R.Məmmədova qarşı Azərbaycan Respublikası Cinayət Məcəlləsinin 178-ci maddəsi (dələduzluq) ilə cinayət işi başlanıb.