Bu əraziyə gedən avtomobil və kanat yolları bağlanıb

Mayın 6-da Yaponiya hökuməti Tokionun cənub-qərbində yerləşən məşhur Hakone kurort rayonunda vulkan püskürməsi təhlükəsi yarandığına görə əhalinin təcili təxliyə olunması barədə qərar qəbul edib. Həmin ərazidə yerləşən Ovakudani yaylasına 700 metrdən çox yaxınlaşmaq qadağan olunub. Burada fasiləsiz olaraq hidrogensulfidin və buxarın qalxması müşahidə olunur. Mayın 4-də həmin sahədə yüzə yaxın vulkanik zəlzələ qeydə alınıb.
Hökumət orqanları əraziyə gedən avtomobil və kanat yollarını bağlayıb. Hazırda polis orada olan turistləri təxliyə etmək üçün ərazini araşdırır.
Hündürlüyü 1550 metr olan Hakone yatmış vulkanı ərazisində yeraltı təkanların sayı aprelin sonlarından artmağa başlayıb. Bu ərazidə sonuncu vulkan püskürməsi XII əsrə təsadüf edir.
Ərazisində gözəl dağ gölü, çoxsaylı muzeylər, istisu bulaqları və turist yollarının yerləşdiyi Hakone rayonunu hər il təxminən 20 milyon turist ziyarət edir.