Cəlil Cavanşir: "Belə zəif mətni çap etdirmək üçün ən azı həyasız olmaq lazımdır"

"Yazıçı Anar məlum həcvində özünü ifşa elədi. Gənclərdən daha cığal və oyunbaz olduğunu bir daha göstərdi. eyni zamanda həmin şeirdəki istedadsızlıq da açıq-aydın hiss olunur”. Bu sözləri “Vətəninfo.az”a açıqlamasında tanınmış gənc yazar Cəlil Cavanşir bildirib: “Belə zəif mətni çap etdirmək üçün ən azı həyasız olmaq lazımdır. Gənc yazarlardan kimsə bu cür zəif həcv yazsaydı, onu çoxdan topa tutmuşdular. Amma xalq yazıçısı utanmadan yazır və özünü savunur. Mən düşünürəm ki, hakimiyyət az da olsa ədəbiyyatla maraqlanırsa AYB-ni ləğv edib, yerində müstəqil təşkilatların yaranmasına kömək eləməlidir. Anar qoca, yaşlı adamdır. Onun ciddi şəkildə istirahətə ehtiyacı var. Ümumiyyətlə gənclərin istəklərini nəzərə almaq, problemlərin həllinə çalışmaq lazımdı. Anar gərək özü də kresloda ölməyi arzulamasın”–deyə, C.Cavanşir əlavə edib. 

Bununla bağlı "Vətəninfo"ya açıqlama verən "525-ci qəzet"in baş redaktoru, Yazıçılar Birliyinin katibi Rəşad Məcid bildirdi ki,"Cəlil Cavanşir qələt eliyir, başını daşa döyür. Əgər o elə bir söz deyibsə, cavandı qanmır. Bu cür ifadələr adi insan tərbiyəsinə, etik qaydalara ziddir. Azərbaycan dövləti ötən il Anarı xidmətlərinə görə mükafata layiq gördü. Yazıçılar Birliyinin qorunub saxlanması Anarın adı ilə bağlıdır. Bunu görməyən heyvərədir. Özündən 50 yaş böyüyə o cür ifadələrlə yanaşmaq tərbiyəsizlikdən başqa bir şey deyil”.

Mirvari Nəcəf, Oral MƏDƏNÇİ