Əhməd Əhmədzadə Birinci Şıxlını susuz qoyub

Redaksiyamıza Qazax rayonu Birinci Şıxlı kəndinin sakini Qasım Mustafayev müraciət edib. O, müraciətində bildirir ki, artıq bir neçə ildir Birinci Şıxlı kəndi içməli suya həsrətdir. Dəfələrlə rayon icra hakiminə müraciət etsələr də,  kənd içməli su ilə təmin olunmur. Kəndin 9 illik natamam orta məktəbinin yaxınlığında  həm məktəbliləri, həm də kənd sakinlərini içməli su ilə təmin etmək üçün “Çinar”firması Azərbaycan Meliorasiya və Su Təsərrüfatı Açıq Səhmdar Cəmiyyətinin sifarişi əsasında su-artizan quyusu qazıb. Lakin bu günə kimi quyu istifadəyə verilməyib. Qasım Mustafayevin sözlərinə görə, onlar bir müddət öncə Azərbaycan Meliorasiya və Su Təsərrüfatı Açıq Səhmdar Cəmiyyətinin sədri Əhməd Əhmədzadəyə müraciət ediblər və hələ də onların müraciətinə cavab verilməyib.

Qasım Mustafayev və kənd sakinləri redaksiyamız vasitəsilə Azərbaycan Meliorasiya və Su Təsərrüfatı ASC-dən onların şikayətlərinə baxılmasını və kəndin içməli suya olan tələbatının ödənilməsini  tələb edirlər.