Şuşanın işğalına rəhbərlik etmiş "Komandos” ləqəbli erməni general Arkadi Ter-Tadevosyan  öz "Facebook” səhifəsində yaydığı bir şəkillə Xocalı soyqırımının günahını az qala öldürülən dinc əhalinin boynuna yıxır.

 Arkadi Ter-Tadevosyan iddia edib ki, nümayiş etdirdiyi şəkildə Xocalı Ermənistan ordusu tərəfindən işğal edildikdən sonra ələ keçmiş bir sənədlərdən birinin surətidir:

"Sənədlərdən biri göstərir ki, azərbaycanlılar şəhəri iki istiqamətdə tərk edə bilərdilər ki, bunlar yalnız insanların deyil, həm də hərbi texnikanın hərəkətinə imkan verirdi”,- deyə Arkadi Ter-Tadevosyan bildirib.

Şəkildə guya Azərbaycan Milli Təhlükəsizlik Nazirliyinin əməkdaşı olan hansısa Bəxtiyarovun rusca yazdığı məktub təsvir olunub. 1992-ci il fevralın 17-də yazılmış məktubda deyilir ki, iki istiqamətdə hərəkət etməklə Xocalı sakinlərini Ermənistan ordusunun mühasirəsindən çıxarmaq mümkündür.

1992-ci il fevralın 25-dən 26-na keçən gecə Ermənistan silahlı qüvvələri tərəfindən Rusiyanın 366-cı motoatıcı alayının iştirakı ilə Xocalı şəhərində etnik azərbaycanlılara qarşı baş vermiş soyqırım nəticəsində 63-ü uşaq, 106-sı qadın, 70-i qoca və qarı olmaqla, 613 Xocalı sakini qətlə yetirilib, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. Ermənistan əsgərlərinin gülləsindən 76-sı uşaq olmaqla, 487 nəfər yaralanıb. 1275 nəfər əsir götürülüb. Girov götürülənlərdən 150 nəfərinin, o cümlədən 68 qadın və 26 uşağın taleyi bu günədək məlum deyil.

Ermənistan bu faciədən sonra faktları gizləitməyə çalışırdı. Lakin Azərbaycanın Milli Qəhrəmanı Çingiz Mustafayevin çəkdiyi kadrlar faciə barədə bütün dünyanı məlumatlandırdı. O, Ermənistan ordusunun soyqırım həyata keçirdiyini, insanları bilərəkdən qırdığını bütün dünyaya çatdırdı. Ermənistan tərəfi artıq etnik azərbaycanlıları  qətlə yetirdiklərini təkzib edə bilmirlər. Sadəcə, müxtəlif versiyalar irəli sürərək bunun soyqırım olmadığını iddia etməyə çalışırlar.

Erməni mətbuatı indi iddia edir ki, Xocalıya hücum hava limanını ələ keçirmək üçün lazım imiş. Amma nə həmin vaxt, nə də ondan sonra hava limanı işləməyib. Əslində, Ermənistanın indiki prezidenti Serj Sarkisyan o vaxt iştirakçısı olduğu Xocalı soyqırımının həqiqi məqsədini 15 dekabr 2000-ci ildə Britaniya jurnalisti Tomas de Vaala verdiyi müsahibəsində qeyd edib. O vaxt Ermənistanın müdafiə naziri olmuş Serj Sarkisyan deyib:

"Xocalıya qədər azərbaycanlılar düşünürdülər ki, onlar (ermənilər - red.) sadəcə zarafat edirlər. Azərbaycanlılar düşünürdülər ki, ermənilər dinc əhaliyə əl qaldıra bilməyən insanlardır. Bu fikri dağıtmaq lazım idi. Belə də oldu”.

Yəni şərhə ehtiyac yoxdur./İstiPress/