“Ermənistan bölgədə baş verən hadisələri düzgün qiymətləndirə bilmir”

Türkiyə-Azərbaycan əlaqələrini heç bir qüvvə poza bilməz.

Bu sözləri Vətəninfo.az-a Türkiyənin Ədalət və İnkişaf Partiyasının deputatı Fəraməz Üstün deyib.

“Bu gün Türkiyə-Azərbaycan əlaqələri elə bir səviyyədədir ki, hansısa güclərin bu əlaqə arasında problem yaratması mümkün deyil. 

Cənubi Qafqazda iki qardaş ölkənin siyasi-iqtisadi və mədəni-sosial üstünlükləri var. Bu üstünlük artımla davam etməkdədir. Bölgədə həyata keçirilən ortaq layihələr əlaqələrə xüsusi önəm verməkdədir”, - deyən millət vəkili Ermənistanın bu proseslərdə kənarda qalmasının bu ölkənin siyasi uzaqgörənliyinin olmaması ilə əlaqələndirdi:

“Çox təəssüflər olsun ki, Ermənistan rəhbərliyi bölgədə cərəyan edən hadisələri düzgün qiymətləndirə bilmir. Ermənistanla Azərbaycan arasındakı gərginlik, xüsusilə də Qarabağın işğal altında saxlanması, onları inkişaf prosesindən kənarda qoyur. Bu isə ümumilikdə Ermənistana böyük mənfi təsir göstərir”.

Elnur Eltürk