Həsənağa Turabov anıldı

Akademik Milli Dram Teatrında Azərbaycan xalq artisti Həsənağa Turabovun 75 illiyinə həsr olunmuş yubiley mərasimi keçirilib. Vətəninfo.az-ın məlumatına görə, yubiley tədbirində aktyorun yaxın dostları xatirələrini qonaqlarla bölüşüblər və sənətkarın özünəməxsus yaradıcılıq yolundan söz açıblar. Tədbirdə mərhum sənətkarın çəkildiyi filmlərdən epizodlar da nümayiş olunub.

Qeyd edək ki, Həsənağa Turabov 1938-ci il aprelin 24-də Bakı şəhərində anadan olub. 31 saylı orta məktəbdə təhsil alıb. Orta məktəbi bitirdikdən sonra Azərbaycan İncəsənət İnstitutuna daxil olub və 1960-cı ildə aktyorluq ixtisası üzrə ali təhsilini başa vurub. Elə həmin ildən Azərbaycan Dram Teatrında aktyor kimi fəaliyyətə başlayıb və ömrünün sonuna qədər bu teatrda çalışıb. Həsənağa Turabov 1987-2001-ci illərdə teatrın direktoru və bədii rəhbəri vəzifələrində işləyib.

Mənalı ömrünü Azərbaycan milli teatr və kino sənətinin inkişafına həsr etmiş bu məşhur aktyorun teatr və kino tariximizdə silinməz izləri var. O, klassik və müasir aktyor sənəti ənənələrindən bəhrələnərək, öz yolunu, öz məktəbini yaradıb.