İCTİMAİ PALATA 20-Cİ SAHƏDƏN İMTİNA EDİR

Bu gün saat 16-da İctimai Palatanın Koordinasiya Şurasının toplantısı Müsavat Partiyasının qərargahında olacaq

Müsavat Partiyasından Veteninfo.az-a verilən məlumata görə, iclasda 8 aprelə təyin olunmuş mitinqi ilə bağlı ciddi müzakirələrin keçiriləcəyi gözlənilir. Böyük ehtimalla Koordinasiya Şurasının 19 martda mitinqi yeri ilə bağlı verdiyi qərara dəyişiklik edəcək.

KŞ-nın 19 mart iclasından sonra yayılmış rəsmi məlumatda mitinq üçün müraciətdə 3 ünvanın-“Təbriz” kinoteatrı qarşısındakı meydanın, “Nərimanov” kinoteatrı qarşısındakı meydanın və Səbael rayonu 20-ci sahə adlanan ərazidəki Sürücülük məktəbinin təlim meydançasının (17 martda gənclərin mitinq keçirdiyi ünvan) göstəriləcəyi bildirilmişdi. 

Bugünkü toplantıda KŞ-nın 20-ci sahədən imtina edəcəyi və Bakı Şəhər İcra Hakimiyyətinə ünvanlanacaq məktubda 20-ci sahədəki Sürücülük Məktəbinin təlim meydançasının göstərilməməsi barədə qərar çıxarılacağı gözlənilir. 

Rövşən ZİYA