Hərbi ekspert Elxan Şıxəliyev isə "AzPolitika”-ya şərhində bildirib ki, hərbçimiz şərti sərhədi bilməyərəkdən keçib: "Dumanlı hava şəraitinə görə, hərbçimiz bilməyərəkdən Ermənistan tərəfə keçib. Ermənistan tərəfi həmişəki kimi hərbçimizin üzərində silah olmasını qabartmağa, bu amildən öz məqsədləri üçün istifadə etməyə çalışır. Bunun üzərinə Azərbaycanla danışıqlarda müxtəlif tələblər irəli sürəcək. Atəşkəs və 44 günlük Vətən müharibəsi dövründən sonra Ermənistan, eləcə də Azərbaycan tərəfdən bilərəkdən və ya bilməyərəkdən şərti sərhədi keçərək, əsir düşüən hərbçilər olub. Ermənistan hər zaman bundan alver predmeti kimi istifadə edib. Bu dəfə də belə edəcəklər”.

"Müəyyən müddət hərbçimizi sorğu-suala tutacaq, bir neçə istiqamətdə məlumatların əldə olunması üçün şantaj edəcək, gələcəkdə casusluğa cəlb etmək üçün əməliyyat həyata keçirəcəklər. Hərbçimizin Azərbaycana qaytarılması qarşılığında təbii ki, bir istəkləri olacaq. Ola bilsin ki, əsir mübadiləsi fonunda Qarabağda cinayət törətmiş, hazırda Azərbaycanda həbsdə olan erməni separatçılarının sərbəst buraxılması tələbi irəli sürüləcək. Bir sözlə, maksimum bundan yararlanmğa çalışacaqlar”,- deyə ekspert bildirib.