Milyoneri həbs etdilər

Rumıniyanın Apelyasiya Məhkəməsi ölkənin ən zəngin adamı İon Nikulaeni 2,5 il müddətinə azadlıqdan məhrum edib. Modern.az xarici mətbuata istinadən xəbər verir ki, o, bu cəzaya 2009-cu ildə ölkəsində keçirilən prezident seçkilərində namizədlərdən birinin seçki kampaniyasına qanunsuz yolla 1 milyon avro ayırdığı üçün məhkum edilib. İstintaq müəyyən edib ki, Nikulae Rumıniya Sosial-Demokrat Partiyasının sədri Mirçi Conaenin seçki kampaniyasına gizli şəkildə pul ayırıb. Həmin pullar partiyaınn üzvü George Stanku vasitəsilə ötürülüb. 2009-cu ildə keçirilən seçkilər zamanı ikinci tura çıxan Mirçi Conae sonda prezidentlik uğrunda mübarizəsini Trayan Baseskuya uduzub.

Breila şəhərinin meri George Stanku pul maxinasiyalarında iştirakına görə 3 il müddətinə azadlıqdan məhrum edilib.

İon Nikulae Rumıniyanın ən böyük maliyyə qrupu olan “İnterAgro”nun sahibidir. Biznesmenin şəxsi sərvəti 1,25 milyard dollar təşkil edir.