“Oqtayı tutduq, sizi də tutarıq” mesajı verilir”

«Biz Oqtay Gülalıyevin həbsi barədə məlumatı bütün səfirliklərə, beynəlxalq təşkilatların nümayəndəliklərinə çatdırmışıq. Artıq onların hamısı bu hadisədən xəbərdardır». “Vətəninfo.az”ın məlumatına görə bunu Teleqraf.az-a açıqlamasında hüquq müdafiəçisi Novella Cəfəroğlu deyib. Hazırda Kürdəxanıdakı təcridxanada saxlanılan O.Gülalıyevin yanına getməyə hazırlaşdıqlarını deyən N.Cəfəroğlu bildirib ki, onun həbsi ilə bağlı bəyanatla da çıxış edəcəklər: « Bu, həqiqətən də ağlasığmaz bir olaydır. Vətəndaş cəmiyyəti institutlarının hamısı bu işə qarışmalıdır. Çünki sabah onların da hər birini belə bir təhlükə gözləyə bilər. Hesab edirəm ki, vətəndaş cəmiyyəti institutları bu məsələyə kəskin reaksiya verməlidirlər». Hüquq müdafiəçisi onu da qeyd edib ki, “Kür” VC Qərargahının əlaqələndiricisinin həbs olunmasına etiraz edəndə rəsmi dairələr O.Gülalıyevin insanları mitinqlərə təhrik etməsi səbəbindən həbs olunduğunu bildiriblər: «Biz dəqiq bilirik ki, o, Minbaşı kəndinə insanların vəziyyətini öyrənmək üçün gedib. O, rayonlarda insanlarla görüşüb vəziyyətlərini öyrənib, hüquqlarının nədən ibarət olduğunu deyib. Hakimiyyəti də narahat edən odur ki, insanlar öz hüquqlarını bildikdən sonra öz haqlarını tələb edəcək. Ona görə də hamıya dərs olsun deyə «Baxın, Oqtayı tutduq, sizi də tutarıq” mesajı verilir»