PKK ilə aparılan danışıqlar terrora son qoyacaqmı? - EKSKLÜZİV

Mövzu ilə bağlı Vətəninfo.az-a açıqlama verən politoloq Natiq Miri bildirib ki, əvvəla terrorçularla danışıqlar aparmaq heç bir dövlət adına şərəf gətirəcək bir şey deyil. Dövlətin terroçularla danışıqlar və bazarlıqlar etməsi hakimiyyətin bu bəla qarşısında aciz qaldığını göstərir. Ona görə də AKP hakimiyyəti terroçubaşı ilə danışıqlara başlamamışdan öncə acizliyini etiraf etsəydi daha səmimi olardı. Terrorçubaşı ilə danışıqlar isə heç bir müsbət nəticə verməyəcək. Çünki bu gün PKK terroru vahid mərkəzdən idarə olunmur. PKK bir neçə qola ayrılıb ki, hər birisi də müxtəlif çevrə ölkələri tərəfindən maliyyələşdirilir, idarə olunur. Bu gün terrorçubaşı Öcalan kimə hökm edəcək ki? İsrailəmi, Suriyayamı, İranamı, İraqamı, yoxsa, bəzi Avropa ölkələrinəmi? Bu siyahını bir az da uzatmaq olar. Acınacaqlı vəziyyət göz qabağında ola ola, AKP hakimiyyətinin Türkiyə adına sayqısız davranışı nəyə əsaslanır, anlamaq olmur. Ola bilsin növbəti dəfə çoxmilyonlu kürd elektoratının rəyini manipulyasiya etmək üçün uğursuz cəhd edilir. Çünki bu cür şərəfsiz danışıqlar nəticəsi əvvəlcədən bəlli olan danışıqlar silsiləsindəndir. Nəticə isə həmişəki kimi xəyal qırıqlığı olacaq.

Rəqsanə Yusifzadə