Ramil Həsənov ASAİF-ın forumunda iştirak edəcək

 TÜRKPA Baş Katibi Ramil Həsənov ’’Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumu’’nun (ASAIF) 6-7 aprel 2012-ci il tarixlərində Macarıstanın paytaxtı Budapeşt şəhərində keçiriləcək növbəti forumunda iştirak edəcək. “Vətəninfo.az”a TÜRKPA-dan verilən məlumata görə, forumun keçirilməsində əsas məqsəd dünyanın müxtəlif ali məktəblərində təhsil alan gənclərin milli-mənəvi dəyərlərimiz ətrafında birləşərək respublikamızın xaricdə təbliğinin səmərəli təşkilində şəbəkələşmə prosesini gücləndirmək, gənclərin problemləri ilə maraqlanmaq və onların operativ həll olunması üçün uyğun şərait yaratmaqdır. Eyni zamanda tədbirin digər önəmli cəhəti dövlət rəsmiləri ilə gənclərin bir araya gətirilərək onlar arasında dialoqu təmin etmək və Macarıstan-Azərbaycan münasibətlərinin inkişafı istiqamətində gənclərin fəallığının artırmaqdır. Tədbirin işində dövlət rəsmiləri, millət vəkilləri, səfirlər, həmçinin bir çox media strukturların rəhbər heyətləri, biznes struktur rəhbərləri, ictimai xadimləri və müxtəlif sahələrdən olan qonaqların iştirakı nəzərdə tutulur. Forumun 2-ci günündə  ASAİF-in xarici ölkələr üzrə nümayəndələrinin məruzələri və dörd fərqli mövzunu əhatə edən işçi qrupları üzrə müzakirələr keçiriləcək. TÜRKPA Baş Katibi “Ermənistan-Azərbaycan Dağlıq Qarabağ probleminin dünya ictimaiyyətinə çatdırılmasında gənclərin rolu’’ mövzusunda keçiriləcək panelin moderatoru olacaq.