Rövşən Bağırov villa məsələsinə aydınlıq gətirdi: "Mənim Bakıda villam yoxdu"

Lerik rayon İcra Hakimiyyətinin başçısı Rövşən Bağırov Vətəninfo.az-a Səbail rayonu "Dosluq" parkı ərazisinin bir hissəsində qanunsuz tikilən və ölkə prezidenti İlham Əliyevin göstərişi ilə sökülən villalardan birinin onun olduğu ilə bağlı yayılan məlumata aydınlıq gətirib. Rövşən Bağırov yayılan məlumatın əsassız olduğunu qeyd edib:

"Sizə səmimi deyirəm Mənim Bakı şəhərində hər hansı bir villam olmadığı kimi, hardasa bir qarış torpaq sahəm belə yoxdu. Belə bir yalan, həqiqəti özünə əks etdirməyən xəbərin yayılmasının səbibini anlamaq olmur. Niyə və hansı səbəbdən insanlar haqqında bu cür fikirlər formalaşdırılmağa cəht edilir. Guya mən qeyd olunan villanın inşaatına 2 milyondan artıq xərc çəkmişəm. Bu boyda böhtanmı olar. Əgər belə bir məlumatı yayanların əlində rəsmi şəkildə faktları vardırsa buyurub ortaya qoysunlar. Bu böyük bir ittihamdır. Əks təqdirdə belə məlumatı mətbuat vasitəsi ilə yayanlarla bağlı qanuni çərçivədə ölçü götürülməsi üçün müvafiq qaydada addımlar atılacaqdır".  Rövşən Bağırov Səbail rayon ƏSSM-də işləməsi ilə bağlı xəbərə də aydınlıq gətirib. " Bəli mən Səbail ƏSSM-də baş mühasib işləmişəm. Bu məlumatı da mənim haqımda tərcümeyi halımdan götürüblər. Mən qeyd edilən rayonda mühasib işləmişəm deyə, mənim orda hansısa torpağım, obyektimin olmalı idi. Ən azından bir xəbəri yayanda heç olmasa bunu dəqiqləşdirib yaysınlar".

Vətəninfo.az