Tayvana məxsus təyyarə qəza enişi etdi

Tayvanın “Trans Asia Airways” şirkətinə məxsus A330 sərnişin təyyarəsi mayın 12-də Yaponiyanın Hokkaydo adasındakı Sapporo şəhərinin Şin-Titoşe hava limanına qəzalı eniş edib. Limana enmək üçün icazə istəyən təyyarənin komandiri göyərtədə avadanlıqla bağlı problem olduğunu bildirib.
Aeroportun administrasiyasının yaydığı məlumatda qeyd edilir ki, təyyarənin enişi zamanı heç bir hadisə baş verməyib və xəsarət alanlar yoxdur. Lakin təyyarənin çənlərindən yanacaq sızması təhlükəsi var və o yanğınsöndürən maşınlarla əhatəyə alınıb. Bununla əlaqədar, təyyarənin dayandığı uçuş-enmə zolağı bağlanıb.
A330 təyyarəsi Tayvanın Taybey şəhərindən Şin-Titoşeyə növbəti reysi həyata keçirirmiş. Nasazlıq təyyarə yapon aeroportuna yaxınlaşan zaman aşkar olunub və buna görə də komandir növbədənkənar qəzalı eniş barədə xəbərdarlıq edib.

AZƏRTAC