Xəbər verdiyimiz kimi, "Ərzaq məhsullarının tədarükü və təchizatı” Açıq Səhmdar Cəmiyyəti Kənd Təsərrüfatı Nazirliyinin tabeliyindən çıxarılıb.

 

Bu, Azərbaycan prezidenti İlham Əliyevin imzaladığı "Ərzaq məhsullarının tədarükü və təchizatı” Açıq Səhmdar Cəmiyyətinin yaradılması haqqında” Azərbaycan Respublikası Prezidentinin 2016-cı il 11 aprel tarixli 1944 nömrəli Sərəncamında dəyişikliklər edilməsi barədə” sərəncamında əksini tapıb.

 

Kənd təsərrüfatı naziri Heydər Əsədov nəqliyyat naziri Ziya Məmmədovun qudasıdır.  Son 1 ildə Ziya Məmmədovun demək olar ki, bütün səlahiyyətləri alınıb və faktiki portfelsiz nazirə çevrilib.

Miq.az oxuculara xatırlatmaq istəyir ki, bir neçə ay bundan qabaq bəzi nazirliklərdə öz adamlarını ildırım sürəti ilə  yerləşdirən Heydər Əsədovun qardaşının da nazirliklərdən birinə yüksək vəzifəyə təyin ediləcəyi ilə bağlı yazı yazmışdıq. Amma onun birdən-birə "vurulması" və mətbuatda haqqında sürətlə yayılan kompromatlar,  işçilərinin rüşvət alması nazirin gözdən düşməsinə səbəb olub.  

Redaksiyamıza daxil olan məlumata görə, 61 yaşlı Şiraslan Əsədovun yaxın günlərdə Əmək və Əhalinin Sosial Müdafiəsi Nazirliyində Əmək Müfəttişliyi Xidmətinin rəisi vəzifəsinə gətirilmək üçün hazırlıq işləri də tamamlanmışdı.