2 aprel məhbusları məhkəməyə üz tutub

Bakıdakı 16 saylı Cəzaçəkmə Müəssisəsində saxlanan Müsavat üzvi, 2011-ci il aprelin 2-də İctimai Palatanın paytaxtda keçirdiyi etiraz aksiyasına görə həbs olunan Ülvi Quliyev cəzasının daha yüngül cəza ilə əvəzlənməsi üçün Suraxanı Rayon Məhkəməsinə müraciət edib. “Vətəninfo”nun məlumatına görə, bu barədə “Media forum” saytına Müsavat Məclisinin üzvü Mustafa Hacıbəyli bildirib. Mustafa Hacıbəylinin sözlərinə görə, Suraxanı məhkəməsinin müraciətə gələn həftə 16 saylı Cəzaçəkmə Müəssisəsində baxacağı gözlənir: “Ülvi Quliyevin müraciətinə 2 aprel məhbusları - Müsavat Partiyası Mərkəzi İcra Aparatının rəhbəri Arif Hacılı və AXCP üzvü Zülfüqar Eyvazlının müraciəti ilə eyni vaxtda baxılacaq. Onlar da cəzalarının daha yüngül cəza ilə əvəzlənməsi üçün müraciət ediblər”.