Avtoritetlərin kralı həbs edildi

90-cı illərdə o, Amerikada evləndiyi xanımın soyadının qəbul edərək Aleksandr Bor olmuşdu.

Kriminal aləmdə “Timo Qomelski” ləqəbi ilə tanınan “qanuni oğru” Aleksandr Timoşenko həbs edilib. Rusiya mətbuatının məlumatına görə, o, narkotik maddənin qanunsuz saxlanılmasında ittiham edilir. Onun həbs qətimkan tədbiri seçilmədən mühakimə edilməsi üçün vəkilləri 5 milyon rubl girov təklif etsələr də, məhkəmə bununla razılaşmayıb. İkinci qrup əlil olan “qanuni oğru” istintaqın davam edəcəyi 2 ay müddətində həbsdə qalacaq. Öz evinin qarşısında saxlanılan Timoşenkonun cibindən kibrit qutusunda 30 qr həşiş tapılıb. 

Həyatının 25 ildən artığını həbsdə olan Timoşenko Belorusun kriminal aləminin kralı hesab edilir. O, həmçinin hazırda fəaliyyətdə olan 6 belorus “qanuni oğru”dan 4 - nün “xaç atası”dır. 

90-cı illərdə o, Amerikada evləndiyi xanımın soyadının qəbul edərək Aleksandr Bor olmuşdu. Ancaq bu yaxınlarda yenidən atasının soyadını geri qaytarıb. 

Xatırladaq ki, bu ilin yanvarında Timoşenkonun evinin yaxınlığında oğru “sxodka”sı keçirilmişdi. Hazırda bu “sxodka”nın iştirakçısı olan 4 nəfərdən üçü - Paştet, Medvejonok və Timoşenko həbsdədir. Bundan başqa Timoşenkonun taclandırdığı 2 “qanuni oğru”- Lebed və Mumu də ötən 2 ay müddətində həbs edilib. Beləliklə Belorus milisi öz iştirakı olmadan qısa müddət ərzində “qanuni oğru”ları zərərsizləşdirə bilib. 

Timoşenkonun İtaliya mafiyası ilə əlaqələrinin olduğu bildirilir. 

aznews.az